Wararka

Wasiir ku xigeenka Wasaaradda Dhalinyarada iyo Ciyaaraha Xil. Dahabo Susow Maxamud ayaa maanta xafiiskeeda ku qaabishay wafdi uu hoggaaminaayey ku simaha Safiirka Turkiga u fadhiya Soomaaliya Mr Ozan Can Gümüş Booqashadaas oo ujeedkeedu ahaa dardar galinta iyo xog is weydaarsi ku saabsan heshiisyo dhanka horumarinta Isboortiga ah oo ay horay u kala saxiixdeen labada Dal ee Turkiga iyo Soomaaliya.Safiirka oo booqashadiisa ay ku wehliyeen masuuliyiin uu kamid ahaa Akif Adnan Dizer ayaa ugu horeyn faahfaahin ka bixiyay qeyb ka mid ah heshiisyada horay loo galay iyo muhiimadda ay leeyihiin hirgelintooda.Kulanka oo goobjoog uu ka ahaa Agaasimaha Waaxda Isboortiga ee Wasaaradda Mudane Saacid Maxamed Xasan ayaa dhankiisa sharaxaad kooban ka bixiyay taariikhda guud ee Isboortiga Soomaaliya, marxaladihii uu soo maray iyo guulihii laga gaaray iyo qorsheyaasha wasaaradda ee dhanka Horumarinta Isboortiga.Ku simaha Safiirka Turkiga u fadhiya Soomaaliya Mr Ozan Can Gümüş oo bogaadiyay dadaalada ay wado Wasaaradda ayaa ku booriyay Wasiir ku xigeenka in la sii dar dar galiyo hirgalinta mashruucyada hormarineed ee Isboortiga.Ugu Dambeyn Wasiir ku xigeenka Wasaaradda ayaa Safiirka iyo Wafdigii la socday uga mahad celisay booqashadooda waxayna soo dhoweysay dadaalada uu dalka Turkiga ugu jiro garab istaagga Dawladda Soomaaliya iyo mashaariicda wax tarka leh oo ay dalka ka wadaan, si gaar mashaariicda horumarinta Isboortiga oo la filayo in dhawaan howlahoodu bilaabmaan.

Ra”iisul wasaare ku xigeenka XFS Mudane Abdisalaan Cabdi Cali ayaa maanta xillalka u kala wareejiyey Wasiirkii hore ee Wasaaradda Dhallinyarada iyo Ciyaaraha Xildhibaan Maxamed Barre Maxamuud iyo Wasiirka Cusub Mr Maxamed Cabduqaadir Cali. Munaasabadaan oo si wayn loo soo agaasimay ayaa waxaa Xillalka kula kala wareegay sidoo kale Wasiir ku xigeenkii hore ee Wasaaradda Xildhibaan Maxamuud Cabduqaadir Jeego iyo Wasiir ku xigeenka cusub Xildhibaan Dahabo Suusow Maxamed waxaana goobjoog ka ahaa Wasiir dowlaha Xafiiska Raii’sul wasaaraha Mr Xirsi Gaani, Wasiirka Wasaaradda Shaqada iyo Arimaha bulshada Md. Yusuf Maxamed,Agaasimaha guud ee wasaaradda Mr Cabdulaahi Jamaal Maxamed ,Agaasime waxeedyada Wasaaradda iyo dhamaan hay’adaha iyo ururada Dhallinyarada iyo Isboortiga . Wasiirka xilka wareejiyay ee Maxamed Barre Maxamuud ayaa sharxay Guulihii iyo howlihii u qabsoomay ee Dhallinyarada iyo Ciyaaraha mudadii uu Xafiiska joogay asagoona kula dardaarmay shaqaalaha inay sii xoojiyaan howlaha ay qarankooda u haayaan. Dhankiisa Wasiirka Cusub ee Wasaaradda Dhallinyarada iyo Cayaaraha XFS Mudane Maxamed Cabduqaadir Cali ayaa balan qaaday inuu kasii wadayo howlaha Hormarinta Ciyaaraha iyo Arrimaha Dhallinyarada wixii dadaala ah ee socdayna uu intii karaankiisa ah ku dari doono in cusubna kusii dari doono sida in wasaaradda xarunteedii rasmiga ahayd dib ugu howlgasho oo kale. Ugu dambayn Ra”iisulwasare Kuxigeenka Dalka Abdisalaan Cabdi Cali Dhaay oo munaasabada Soo xidhay ayaa tilmaamay muhiimada wadankeena u leedahay Wasaaraddan oo uu ku sheegay Awoodii Qaranka Soomaaliyeed maadama bulshada inta ugu badan oo dhallinyaro ah wasaaradoodii tahay wuxuuna u mahadceliyey Wasiir Maxamed Barre oo ku tilmaamah inuu Wax muuqda ka qabatay Wasaaradda mudadii uu hogaaminaayay . Dhanka kalana wuxuu soo dhaweeyay wasiirada cusub asagoo kula dardaarmay shaqo wanaag iyo in meesha ay maantu wasaaraddu joogto kasii horumariyaan.

Wasaaradda Dhallinyarada iyo Isboortiga oo qabatay munaasabadda maalinta Dhallinyarada xirfadlayaasha ah.  Mogadishu, 16 July, 2024:- Wasaaradda Dhallinyarada iyo cayaaraha XFS oo kaashanaysa Wasaaradda shaqada, shaqaalaha iyo arrimaha bulshada ayaa qabatay munaasabad la xiriirta maalinta caalamiga ah ee xirfadda Dhallinyarada.  Waxaa ka soo qayb-galay masuuliyiin uu ku jiro Wasiirka wasaaradda shaqada, shaqaalaha iyo arrimaha bulshada Dr Maxamed Cilmi, kusimaha agaasimaha guud ee Wasaaradda dhallinyarada iyo cayaaraha Mudane Maxamed Xulow Xuseen iyo masuuliyiin kale, waxaana lagu soo qaaday muhiimadda ay dhallinyarada Soomaaliyeed u leedahay xirfadaha lagu shaqaysto.  Wasaaradda Dhallinyarada iyo cayaaraha ayaa xoogga saartay labadii sano ee la soo dhaafay in la dhiirigeliyo xirfaha gaa-gaaban ee dhallinyarada u sahlaya suuqa shaqada inay dhakhso ku biiraan. 

Jadwalka Tartanka dugsiyada Gobolka Banaadir. Wasaaradda Dhallinyarada iyo cayaaraha XFS waxay soo gudbinaysaa tartanka dugsiyada Gobolka Banaadir sanadka 2024 oo xiiso iyo xamaasad gooni ah leh sanadkan. Wasaaradda Dhallinyarada iyo cayaaraha ayaa ahmiyad gooni ah siinaysa tartanka dugsiyada dalka si ay uga soo dhex baxaan xulka qaranka ee mustaqbalka.

Wasiirka wasaaradda dhalinyarada iyo ciyaaraha XFS Mudane Xil Maxamed Barre Maxamuud ayaa magaalada Tripoli ee caasimadda Liibiya kula kulmay koox dhallinyarada Soomaaliyeed ah oo go’aansaday inay dalkoodii hooyo ku noqdaan oo isaga laabtaan silica iyo saxariirka ka jira Liibiya iyo halista badda ee sugaysa. Wasiirka ayaa ku wargeliyay dhallinyaradan in 15 ka mid ah ay diyaar yihiin Tickets-koodii iyo waraaqihii socdaalka ay ku noqon lahaayeen( Go-Home) oo 11-ka bishan June ay ka degi doonaan magaalada Hargeisa, halka 25 kale oo iyaguna is diiwaangeliyay inay Mogadishu ka degaan loo soo dhamaystiri doono documents-ka socdaalka inta aysan bishan June dhammaan. Wasiir Maxamed Barre Maxamuud ayaa ku booriyay dhallinyaradan go’aanka geesinimada leh qaatay isagoo ugu baaqay dhallinyarada kale ee faraha badan ee Tripoli jooga inay sidaas oo kale sameeyaan. Wasiirka ayaa la wadaagay dhallinyarada horumarka la tiigsanayo sanadaha soo socda iyo maalgashiga caalamiga ah oo sahlaya shaqo abuur xooggan.

Wasiirka wasaaradda dhallinyarada iyo cayaaraha XFS Mudane Xil Maxamed Barre Maxamuud iyo wafdi uu hoggaaminayo oo booqasho shaqo ku jooga dalka Masar ayaa kulan la qaatay dhiggiisa Masar Dr Ashraf Subxi oo sidoo kale ah guddoomiyaha guddiga fulinta Wasiirrada dhallinyarada iyo cayaaraha wadamada Carabta. Labada wasiir ayaa ka wada hadalay xoojinta iyo kor u qaadidda iskaashiga dhinacyada jihaynta dhallinyarada, is-dhexgalka Ciyaaraha, iyo kala faa’iidaysiga khibradaha maamulka Isboortiga iyadoo dalka Masar uu ka mid yahay wadamada xagga Afrika ugu horreeye dhinaca Ciyaaraha. Wasiir Maxamed Barre Maxamuud iyo Wasiir Dr Ashraf Subxi ayaa sidoo kale isla soo qaaday martigelinta xulka qaranka Soomaaliyeed ee ka qaybgalaya isreeb-reebka koobka adduunka ee qaaradda Afrika iyo sidii xulka qarankeennu Hoyad( Home) ugu noqon lahayd dalka masar inta ciyaaruhu socdaan maadaama tashiilaad badan oo xulalka qaaraddu u baahanyihiin weli dalkeenna u dhimmantahay. Labada wasiir ayaa isla gartay in wixii farsamo ah loo daayo xiriirrada labada dhinac ee Soomaaliya iyo Masar waxaana Wafdiga wasiirka ka mid ahaa guddoomiyaha xiriirka Soomaaliyeed ee kubadda cagta mudane Cali Cabdi Maxamed ( Cali Shiino) oo dhiggiisa Masar kala sii xaajoon doona sidii farsamo ahaan ay dowladda Masar nooga taageeri lahayd kobcinta maamulka iyo farsamada ciyaaraha. Dhinaca kale Wasiir Maxamed Barre iyo wafdigiisa oo ay ka mid ahaayeen agaasimaha guud ee Wasaaradda Mudane Cabdiraxiim Warsame Diiriye iyo Eng Fahad Cali Xasan oo ah la-taliyaha wasiirka ayaa ka qaybgalay furitaanka tuulada ciyaaraha Masar oo ah goobo ay ku dhanyihiin noocyada kala duwan ee garoomada iyo goobaha lagu ciyaaro. Ugu danbayn Wasiirka wasaaradda dhallinyarada iyo cayaaraha Mudane Xil Maxamed Barre Maxamuud ayaa u mahadceliyay danjiraha Soomaaliya ee dalka Masar Amb. Ilyaas Sheekh Cumar iyo Diblumaasiyiinta kale ee safaaraddeena Qaahira oo shaqo qurux badan la qabtay Wasiirka iyo wafdigiisa.