Wasaaradda Dhalinyarada iyo Ciyaaraha ayaa xustay Maalinta Caalamiga ah ee Muhaajiriinta, ayadoo munaasabad diiradda lagu saaray wacyigelin muhiim ah oo ku wajahan dhalinyarada Soomaaliyeed, lagana digayay khatarta weyn ee ka dhalata tahriibka badaha iyo saxaraha oo halis gelinaya noloshooda. Agaasimaha Waaxda Dhalinyarada ee Wasaaradda, Ayaan Maxamed Cabdullaahi, ayaa dhalinyarada Soomaaliyeed ugu baaqday inay dalkooda ku kalsoonaadaan, isla markaana ay door muuqda ka qaataan dhismaha mustaqbalkooda iyo horumarinta qaranka. Waxay xustay in dhalinyarada Soomaaliyeed ay leeyihiin awood, karti iyo maskax ay ku dhisan karaan mustaqbal wanaagsan, ayna abuuri karaan xirfado ay ku shaqeystaan halkii ay halis ugu geli lahaayeen tahriib iyo u haajirid dalal kale. Intii uu kulanku socday, waxaa halkaas ka hadlay culimo, khubaro iyo sidoo kale dhalinyaro hore u tahriibtay balse dib ugu soo laabtay dalka kuwaas oo ka quustay fikirkaas khatarta badan. Dhamaantoodna waxay si qoto dheer uga warbixiyeen dhibaatooyinka faraha badan ee ka dhasha tahriibka, iyagoo si gaar ah u iftiimiyay aragtida diinta Islaamka ee ka digaysa in qofku naftiisa halis geliyo oo tahriibku yahay fal khatar ah oo aan waafaqsanayn diinta, sharciga iyo dhaqanka Soomaaliyeed. Sidoo kale munaasabadda waxaa laga soo jeediyay hadallo dhiirrigelin iyo dardaaran isugu jira kuwaas oo muujinayay muhiimadda ay leedahay in dhalinyaradu doortaan waddo sax ah oo u horseedda nolol, shaqo iyo mustaqbal waara, halkii ay naftooda khatar ugu gelin lahaayeen safarro halis ah. Ugu dambeyn, Agaasimaha Waaxda Shaqada iyo Shaqaalaha ee wasaaradda Dhallinyarada iyo Ciyaaraha Mudane Casharo ayaa soo xiray munaasabadda, isagoo dhalinyarada ku booriyay inay abuuraan fursado shaqo, ka faa’iideystaan awoodooda iyo xirfadahooda oo ay ka fogaadaan tahriibka iyo halistiisa.

Daahfurka Qaran ee Dugsiga Nabadda iyo Dimuqraadiyada Soomaaliya (SPD Somalia) oo Maanta ka Dhacay Muqdisho. Waxaa maanta magaalada Muqdisho si rasmi ah loogu daahfuray Dugsiga Nabadda iyo Dimuqraadiyada Soomaaliya (SPD Somalia) oo munaasabada oo uu hogaaminaayay Wasiirka Wasaaradda Dhallinyarada iyo Ciyaaraha Mudane Maxamed Cabduqaadir Cali ayaa waxaa sidoo kale kasoo qeyb galay wasiiro ay ka mid yihiin Wasiirka Gaashaandhigga, Wasiirka Deegaanka iyo Isbeddelka Cimilada, Senatoro , Xildhibaano iyo masuuliyiin kale oo sare. Daahfurka dugsigan waxaa ka horreeyay dood-wadaagyo bishii hore ka dhacay qaar ka mid ah Dowlad Goboleedyada dalka, kuwaas oo diiradda lagu saaray doorka dhallinyarada ee dimuqraadiyadda iyo amniga. Doodahaas ayaa lagu isla gartay baahida loo qabo in la helo Iskuul si gaar ah u qaabilsan Nabadda iyo Dimuqraadiyadda, si loo xoojiyo wacyiga iyo ka qeybgalka dhallinyarada. Hirgelinta mashruucan waxaa fulisay Wasaaradda Dhallinyarada iyo Ciyaaraha iyadoo kaashaneysa Hay’adda Qaramada Midoobay ee Horumarinta (UNDP) iyo KOICA, taasoo horseeday in maanta si rasmi ah loo daahfuro dugsigan muhiimka ah. Wasiirka Wasaaradda Gaashaandhigga, Mudane Axmed Macallin Fiqi, ayaa si qoto dheer uga hadlay muhiimadda uu dugsigani u leeyahay xoojinta amniga iyo dimuqraadiyadda dalka isagoo xusay in Soomaaliya ay si weyn ugu baahan tahay labadaas tiir si loo helo mustaqbal xasilloon. Dhankiisa, Wasiirka Wasaaradda Deegaanka iyo Isbeddelka Cimilada, Sareeye Guud Bashiir Maxamed Jaamac (Bashiir Goobe) ayaa sheegay in hirgelinta Dugsiga Nabadda iyo Dimuqraadiyada ay gacan ka geysan doonto dhismaha Soomaaliya cagaaran oo nabad ku dhisan isla markaana kobcin doonta wacyiga bulshada. Masuuliyiin kale oo ay ka mid ahaayeen Senator Cusmaan Dubbe, Wasiir Al-Cadaala, Wasiir Nuura Mustaf iyo Xildhibaan Cabdifataax Qaasim ayaa si wadajir ah u soo dhaweeyay daahfurka dugsigan iyagoo bogaadiyay doorka uu ka qaadan doono horumarinta dhallinyarada. Ugu dambeyn waxaa munaasabadda soo xiray Wasiirka Wasaaradda Dhallinyarada iyo Ciyaaraha, Mudane Maxamed Cabduqaadir Cali oo ka warbixiyay sida ay wasaaraddu ugu hawlan tahay hirgelinta mashaariic wax ku ool ah oo dan u ah dhallinyarada iyo dalka guud ahaan gaar ahaan kuwa la xiriira nabadda, dimuqraadiyadda iyo hoggaaminta mustaqbalka. Wuxuuna xusay in dugsigan ay ka faa’iidi doonaan inta badan dhallinyarada Soomaaliyeed.

Xiritaanka Tababar 10 Maalmood Socday oo Ku Saabsanaa Hogaaminta iyo Maamul Wanaagga Agaasimaha Waaxda Dhalinyarada ee Wasaaradda Dhalinyarada iyo Ciyaaraha Ayan Mohamed Abdullahi ayaa soo xirtay tababar muddo 10 maalmood ah socday oo si wadajir ah u soo qaban-qaabiyeen Wasaaradda Dhalinyarada iyo Ciyaaraha iyo Netherland’s Institute for Multiparty Democracy (NIMD). Tababarkan oo ahaa mid dhameystiran ayaa diiradda lagu saaray: Hogaaminta, Maamul wanaagga iyo Xalinta khilaafaadka Waxaana ka faa’iideystay ka qaybgalayaal ka kala socday Wasaaradda Dhalinyarada iyo Ciyaaraha, Golaha Dhalinyarada Qaranka, Wasaaradda Arrimaha Gudaha iyo Ururada bulshada rayidka ah Ka qaybgalayaasha ayaa tilmaamay inay tababarka ka barteen aqoon iyo xirfado muhiim u ah hogaaminta casriga ah iyo habka loo maareeyo khilaafaadka si waxtar leh. Tababarkan ayaa ahaa dufcaddii ugu horreysay, kuna saabsan silsilad tababaro kale oo qorshahoodu horey u jiray kuwaas oo ay si wadajir ah u qaban doonaan Wasaaradda Dhalinyarada iyo Ciyaaraha iyo NIMD.

Wafdiga ka socda Wasaaradda Dhallinyarada iyo Ciyaaraha oo uu hoggaaminayay Wasiir Maxamed Cabdulqaadir Cali ayaa booqasho shaqo oo rasmi ah ku tegay magaalada Baku ee dalka Azerbaijan. Wasiirka ayaa kulan la qaatay Wasiirka Dhallinyarada iyo Ciyaaraha ee Azerbaijan Mudane Farid Gayibov kulankaas oo diiradda lagu saaray xoojinta iyo ballaarinta iskaashiga labada dal ee dhinacyada Horumarinta siyaasadaha dhallinyarada,Iskaashiga dhinacyada dhaqanka & isdhexgalka dhallinyarada, Tababarrada , horumarinta ciyaartooyda iyo Kobcinta mashaariicda dhallinyarada ee labada dal. Labada wasiir ayaa isla qaatay in la xoojiyo xiriirka labada wasaaradood iyaga oo hormarin doona Bilateral Agreement ,Si uu u noqdo mid wax-ku-ool ah oo daboolaya baahiyaha dhallinyarada iyo ciyaaraha. Intii uu kulanku socday labada wasiir waxay si qoto dheer uga wada hadleen sidii loo bilaabi lahaa MoU kaas oo noqon doona heshiis rasmi ah oo hagaya habka iskaashi ee labada wasaaradood. Booqashadan Wasiirka dhallinyarada iyo ciyaaraha waxay calaamad muhiim ah u tahay xoojinta xiriirka laba geesoodka ah ee Soomaaliya iyo Azerbaijan, iyada oo la filayo in heshiiska MoU-ga ee la gaari doono uu noqdo mid horseeda horumar muuqda oo dhinacyada dhallinyarada iyo ciyaaraha.

Madaxweynaha Jamhuuriyadda Federaalka Soomaaliya Mudane Xasan Sheekh Maxamuud oo xusaya sumcadda iyo maamuuska uu dadka Soomaaliyeed u soo hoyey ayaa ku qaabilay Madaxtooyada Qaranka Garsoore Cumar Cabduqaadir Cartan oo ku guuleystay abaalmarinta Garsooraha ugu fiican Afrika ee sannadka 2025 oo ay guddoonsiiyeen Xiriirka Kubadda Cagta Afrika ee CAF. Booqashada madaxtooyada ee garsoore Cartan waxaa ku wehliyay Wasiirka wasaarada Dhallinyarada Ciyaaraha Maxamed Cabdulqaadir Cali , Gudoomiyaha Xiriirka Kubada Cagta Cali Maxamed Shiine iyo Gudoomiyaha Golaha Dhallinyarada Qaranka Maxamed Cali Said Chaampa. Madaxweyne Xasan Shiikh ayaa ugu hambalyeeyey Garsoore Cumar Cartan guusha taariikhiga ah ee uu usoo hooyay dalkeena, asagoona tilmaamay in abaal-marintan ay muujineyso kartida iyo daddaalka uu geliyey kor u qaadidda xirfaddiisa, isaga oo u rajeeyey meel halkaa ka sareysa oo heer caalamiya inuu gaarsiiyo magaca Soomaaliyeed. Dhankiisa, Garsoore Cumar Cartan ayaa Madaxweynaha Jamhuuriyadda uga mahadceliyey soo dhoweynta iyo qaabilaadda wanaagsan, waxa uuna xusay in maamuuskan uu ku dhiirrigelinaayo in sii wado dafaalkiisa ku aaddan matalaadda Caalamka Soomaaliya ee fagaareyaasha caalamiga ah.

Iyadoo laga amba qaadayo heshiiskii horay ay u gaareen labada Wasiir ee Wasaaradaha Dhalinyarada iyo Ciyaaraha ee Soomaaliya iyo Boqortooyada Sacuudiga ayaa maanta Wasiirka Wasaaradda Dhalinyarada iyo Ciyaaraha ee Xukuumadda Federaalka Soomaaliya, Mudane Maxamed Cabdulqaadir Cali kulan muhiim ah la yeeshay Agaasimaha Guud ee Sanduuqa Horumarinta Sacuudiga (Saudi Development for Fund) Sultan bin Abdulrahman Al-Marshed. Kulankan ayaa diiradda lagu saaray sidii Soomaaliya looga horumarin lahaa kaabayaasha ciyaaraha, iyadoo laga wada hadlay hirgelinta heshiiskii hore ee ku saabsanaa iskaashiga dhanka dhismaha iyo dib u habaynta garoomada ciyaaraha iyo taageeridda mashaariicda horumarineed ee dhalinyarada Soomaaliyeed. Labada mas’uul ayaa isla qaatay in la dardar geliyo mashaariicda lagu horumarinayo kaabayaasha isboortiga dalka si gaar ahna diirada loo saaro dhisidda iyo dib u habaynta garoomada muhiimka ee dalka. Wasiirka Wasaaradda Dhalinyarada iyo Ciyaaraha, Mudane Maxamed Cabdulqaadir Cali ayaa sheegay in iskaashigan uu yahay mid muhiim u ah horumarinta ciyaaraha iyo dhalinyarada Soomaaliyeed, isagoo tilmaamay in dowladda ay ka go’an tahay in la abuuro fursado cusub oo ay dhalinyaradu kaga qeyb qaataan dhismaha dalka.